 |
| མ་སུ་རིའི་ལྷ་གསོལ་རིའི་རྩེ་ལ་ཨ་མ་ལགས་དང་པཱ་ལགས། ཨ་ཅག་ལགས། ང་བཅས། |
 | ||
| དོན་གྲུབ་གླིང་གི་སྟོན་པའི་སྐུ་བརྙན་མདུན། |
ཆུ་ཚོད་གསུམ་གྱི་རྗེས་ལ་ངའི་ཨ་ཅག་ལགས་ཡིག་ཚད་བཏང་ཚར་བས་ང་ཚོ་དགོས་མཁོ་རྣམས་འཁྱེར་ནས་དོན་གྲུབ་གླིང་(Clementown)ལ་ཕྱིན་ཏེ་སྔ་ས་ནས་མངགས་པའི་མགྲོན་ཁང་ནང་བསྡད་པ་ཡིན། མགྲོན་ཁང་ནང་ལ་ཉལ་ཁྲི་གསུམ་དང་རླུང་འཁོར། བརྙན་འཕྲིན་བཅས་ཡོད་པ་མ་ཟད་ཐབ་ཆས་རང་འགྲིག་གི་ཐབ་ཚང་ཆེན་པོ་ཞིག་དང་ཁྲུས་ཁང་བཅས་མཐུན་རྐྱེན་ཚང་མ་འདུག
དོན་གྲུབ་གླིང་གི་སྨིན་གྲོལ་གླིང་དགོན་པར། ལྷ་བབས་མཆོད་རྟེན་ཤིན་ཏུ་ཆེན་པོ་ཞིག་དང་། དེའི་གཡས་གཡོན་ལ་མཆོད་རྟེན་རྣམ་བརྒྱད་དང་མ་ཎི་འཁོར་ལོ་ཆེན་པོ་གཉིས། ཐོག་རྩེག་གཉིས་ཡོད་པའི་མགྲོན་ཁང་དང་ཚོང་ཁང་འདུག མཆོད་རྟེན་ནང་གི་ཐོག་རྩེག་དང་པོ་ལ་གུ་རུ་རིན་པོ་ཆེའི་སྐུ་བརྙན་ཤིན་ཏུ་མཚར་པོ་ཞིག་དང་མཐའ་སྐོར་དུ་གུ་རུ་རིན་པོ་ཆེའི་རྣམ་ཐར་གྱི་ལྡེབས་རིས་ཧ་ཅང་མཛེས་པོ་དང་མང་པོ་འདུག ཐོག་རྩེག་གཉིས་པ་ལ་སངས་རྒྱས་བཅོམ་ལྡན་འདས་ཀྱི་སྐུ་བརྙན་ཆེན་པོ་ཞིག་དང་མཐའ་ལ་སངས་རྒྱས་བཅོམ་ལྡན་འདས་ཀྱི་སྐྱེས་རབས་ཀྱི་ལྡེབས་རིས་ཧ་ཅང་ཡག་པོ་དེ་འདྲ་འདུག ཐོག་རྩེག་གསུམ་ལ་ཞི་ཁྲོ་བློས་བསླངས་དཀྱིལ་འཁོར་ཤིན་ཏུ་ཆེན་པོ་ཞིག་དང་སྨིན་གྲོལ་གླིང་གི་ཁྲི་རབས་དང་མཁན་རབས་འདུག
བཀའ་རྒྱུད་དགོན་པ་ལ་སངས་རྒྱས་བཅོམ་ལྡན་འདས་ཀྱི་སྐུ་བརྙན་ཧ་ཅང་ཆེན་པོ་ཞིག་དང་། དེའི་ནང་ལ་སངས་རྒྱས་བཅོམ་ལྡན་འདས་ཀྱི་མཛད་པ་བཅུ་གཉིས་ཀྱི་ལྡེབས་རིས་འདུག ད་དུང་སངས་རྒྱས་བཅོམ་ལྡན་འདས་ཀྱི་སྐུ་བརྙན་ཆེན་པོ་དེ་ལ་སྐོར་ར་བརྒྱབ་དུས་མ་ཎི་འཁོར་ལོ་ཆུང་ཆུང་བརྒྱ་ལྷག་ཙམ་ཡོད་ས་རེད། བཀའ་རྒྱུད་དགོན་པའི་ཉེ་འཁོར་ལ་ཡུལ་ལྗོངས་རྣམས་མཛེས་ཤིང་ཡུལ་ལྗོངས་དེ་ཚོ་མི་ཡིས་བཟོས་པ་ཡིན་གྱི་མ་རེད་སྙམ་སོང་། ཡང་སངས་རྒྱས་སྐུ་བརྙན་ཆེན་པོ་དེ་ལ་ཡར་འཛེགས་རྒྱུ་ཡང་འདུག ད་དུང་ཡང་ཡར་འཛུལ་སའི་འཁྲིས་ལ་ཚོང་ཁང་དང་ཟ་ཁང་གཅིག་འདུག
དོན་གྲུབ་གླིང་ནས་གླ་འཁོར་ནང་སྐར་མ་བཅོ་ལྔ་ཙམ་ཕྱིན་རྗེས་(ISBT)སྤྱི་སྤྱོད་རླངས་འཁོར་གྱི་བབས་ཚུགས་ལ་སླེབས་ཀྱི་འདུག དེའི་འགྲམ་ལ་ཚོང་ཁང་ཆེན་པོ་ཆེན་པོ་གཅིག་འདུག དེ་ལ་ཐོག་རྩེག་གསུམ་ཙམ་འདུག དེའི་ཐོག་རྩེག་གཉིས་པ་ལ་གློག་བརྙན་ཁང་ཆེན་པོ་ཞིག་འདུག ང་ཚོ་དེ་ལ་ཕྱིན་ནས་ (The dark knight rises)ཞེས་པའི་གློག་བརྙན་གསར་པ་དེ་བལྟས་པ་ཡིན། གློག་བརྙན་ཁང་ནང་རྐུབ་བཀྱག་དེ་ཚོ་མར་བསྙལ་ཡ་འདུག ཡང་གློག་བརྙན་ཁང་ནང་གྲང་གློག་ཡོད་པ་མ་ཟད་ས་ཚང་མ་ལ་ས་གདན་འདུག བར་སེང་སྐབས་མི་དེ་ཚོས་ཁྱེད་རང་ཞལ་ཏོག་མཆོད་ཀྱི་ཡིན་པས་ཞེས་འདྲི་གི་འདུག གློག་བརྙན་དེ་རྫོགས་པར་ཆུ་ཚོད་གསུམ་ཙམ་འགོར་སོང་། ང་ཚོ་ལྟད་མོ་བལྟ་དུས་མི་མང་པོ་མི་འདུག
ད་དུང་ཡང་ཚོང་ར་ཆེན་པོ་(Big Bazaar)ཞེས་པའི་ནང་ཕྱིན་ནས་ཉོ་ཆ་ཡང་བརྒྱབ་པ་ཡིན། གྲོང་ཁྱེར་དཀྱིལ་གྱི་ཆུ་ཚོད་ཁང་པ་(Clock Tower)ལ་ཕྱིན་ནས་ཁ་ལག་བཟས་པ་དང་མཉམ་དུ་ཚོང་ཁང་(Liluput)ལ་ཕྱིན་ནས་དུག་སློག་མང་པོ་ཉོས་པ་ཡིན། དེའི་གཡས་གཡོན་གང་ས་ལ་ཉོ་ཆ་བརྒྱབ་པ་ཡིན།
དེ་ནས་ཉིན་གཅིག་མ་སུ་རི་ལ་ཕྱིན་པ་ཡིན། མ་སུ་རི་ལ་འགྲོ་དུས་ལམ་ཁ་རྣམས་གཡང་གཟར་པོ་རེད་འདུག་པ་མ་ཟད་ལུང་པ་དེ་རི་རྩེ་ལ་ཆགས་འདུག བྱས་ཙང་ང་ཞེད་ནས་མ་ཎི་སྐྱོར་དགོས་བྱུང་སོང་། མ་སུ་རི་བོད་ཁྱིམ་སློབ་གྲྭ་དེ་རྒྱ་གར་ནང་ནས་བོད་པའི་སློབ་གྲྭ་དང་ཤོས་དང་དགོན་པ་དེ་ཡང་རྒྱ་གར་ནང་ནས་བོད་པ་སྐྱབས་བཅོལ་བའི་དགོན་པ་དང་ཤོས་རེད་འདུག ཡང་ང་ཚོ་ལྷ་གསོལ་རི་ལ་ཕྱིན་པ་ཡིན། ལྷ་གསོལ་རི་དེ་སྐྱིད་པོ་ཞེ་དྲགས་འདུག དེ་རྗེས་ང་ཚོ་ཅོ་ཅོ་རྟ་མགྲིན་ལགས་ཀྱི་ནང་དུ་ཕྱིན་ནས་ཉིན་དགུང་ཁ་ལག་བཟས་པ་ཡིན། ད་དུང་ཁོང་གི་ཕྲུ་གུ་ཡང་མཐོང་སོང་།
 |
| དོན་གྲུབ་གླིང་གི་མཛེས་ལྗོངས་ནང་། |
ཉིན་བདུན་རིང་ང་ཨ་ཅག་ལགས་དང་ཕ་མ་གཉིས་མཉམ་དུ་ཧ་ཅང་སྐྱིད་པོ་བྱུང་།། །།
3 comments:
I'm sorry can't read Tibetan, but I love your photos so much!! It's great to see all of you looking so happy and healthy! Thank you for posting. Best wishes, and many Tashideleks! Mati
ཕ་བཟང་བུ་བཟང་རེད་འདུག་ག སྙན་པོ་བྱུང་། མུ་འཐུད་ནས་ཡིན་ད
འཕྲིན་ལས་ལགས། བཀྲ་ཤིས་བདེ་ལེགས།
བདེ་ཆེན་
Post a Comment