ལྷ་བབས་དུས་ཆེན། བོད་ཟླ་ ༩ ཚེས་ ༢༢

  ༄༅།། ལྷ་བབས་དུས་ཆེན་ནི་སངས་རྒྱས་བཅོམ་ལྡན་འདས་ཀྱིས་ལྷ་ཡུལ་དུ་ཡུམ་ལ་ཆོས་གསུངས་ནས་སླར་མི་ཡུལ་ལ་ཕེབས་པའི་རྩ་ཆེན་གྱི་ཉིན་མོ་དེ་རེད། དེའི་ཉིན་ཨ་མ་ལགས་ང་གཉིས་ཞོགས་པ་སྔ་པོ་ལངས་ནས་ཞལ་འདོན་སྐྱོར་པ་ཡིན།

     དེ་རྗེས་ཨ་མ་ལགས་ང་གཉིས་ཞོགས་ཟས་ཚར་རྗེས་མོ་ཊའི་ནང་མེག་ལོར་གྷན་ཇི་ལ་ཕྱིན་པ་ཡིན། མེག་ལོག་གྷན་ཇིའི་ལམ་ཁ་ནས་ཨ་ནིའི་དགོན་པ་ལ་སླེབས་དུས་མོ་ཊ་བཏང་མཁན་ལ་དེར་ཁ་ཁོགས་རོགས་ཅེས་ལབ་པ་ཡིན། ཨ་ནི་དགོན་པ་ལ་ནང་མི་སོགས་ཀྱི་ཆེད་དུ་ཞལ་འདེབས་ཕུལ་བ་ཡིན།

    ཨ་ནི་དགོན་པ་ནས་ལམ་ཆུང་བརྒྱུད་གཙུག་ལག་ཁང་ལ་འགྲོ་དུས་ཀི་རྟི་དགོན་པ་ལ་སླེབས་སོང་། ཀི་རྟི་དགོན་པའི་ནང་ཕྱིན་ནས་ཞལ་འདེབས་ཕུལ་བ་ཡིན། གང་ཙམ་སོང་རྗེས་ཨ་མ་ལགས་ང་གཉིས་གཙུག་ལག་ཁང་ལ་སླེབས་སོང་། ཡིན་ཡང་ཨ་མ་ལགས་ང་གཉིས་སྔོན་ལ་གླིང་སྐོར་ལ་ཕྱིན་པ་ཡིན།

     ལྷ་རྒྱལ་རི་ནས་ཨ་མ་ལགས་ང་གཉིས་ཀྱིས་བསང་ཕུལ་བ་ཡིན། གང་ཡིན་ཟེར་ན་ལྷ་བབ་དུས་ཆེན་ཡིན་པས་སྨོན་ལམ་ཡང་མང་པོ་བརྒྱབ་པ་ཡིན། གླིང་སྐོར་གཅིག་བརྒྱབ་ཚར་རྗེས་གཙུག་ལག་ཁང་ལ་སླེབས་སོང་། གཙུག་ལག་ཁང་ལ་ཕྱིན་ནས་དང་པོ་བསང་ཕུལ་བ་ཡིན། དེ་ནས་ཆོས་མཇལ་ཞུས་པ་དང་གཙུག་ལག་ཁང་ལ་སྐོར་ར་གསུམ་བརྒྱབ་རྗེས་ཁྲོམ་ལ་ཕྱིན་པ་ཡིན། ཁྲོམ་ནས་ཚལ་དང་ཀུ་ཤུ་ལ་སོགས་ཉོས་པ་ཡིན། ནང་ལ་ལོག་ཡོང་དུས་ཞོར་ལ་ལ་ཕིང་ཡང་ཉོས་པ་ཡིན།

    ནང་ལ་སླེབས་རྗེས་གནམ་གཤིས་འགྱུར་ལྡོག་ཧ་ཅང་ཆེན་པོ་བྱུང་སོང་། དཔེར་ན། རི་སྒང་ལ་གངས་མ་ཆར་བབས་པ་དང་སྨུག་པ་ཁྱབ་འདུག ད་དུང་རླུང་འཚུབ་དྲག་པོ་བརྒྱབ་སོང་།

    དགོང་དྲོ་ཆུ་ཚོད་༦དང་ཕྱེད་ཀ་ཙམ་ལ་ཨ་མ་ལགས་ལྟད་མོ་བལྟས་པ་དང་ང་ཡི་གེ་བྲིས་བསྡད་དུས་ས་ཡོམ་ཞེད་སྣང་ཚ་པོ་ཞིག་བརྒྱབ་སོང་། ས་ཡོམ་དེ་༤.༥ཡན་མད་ལ་སླེབས་ཀྱི་ཡོད་པ་འདྲ། ས་ཡོམ་བརྒྱབ་དུས་ང་ལམ་སེང་ཉལ་ཁྲིའི་འོག་ལ་འཛུལ་པ་ཡིན། ཨ་མ་ལགས་ང་གཉིས་མང་པོ་ཞེད་སོང་།

     ཡིན་ནའང་ངའི་རེ་བ་ལ་གོང་གི་གནས་ཚུལ་དེ་དག་ཚང་མ་བཀྲ་ཤིས་པའི་རྟེན་འབྲེལ་གྱི་མཚོན་རྟགས་ཡིན་པར་སྨོན།། །།